Sa Lezione Tottu trottu ancaronau...arredda arredda si che sezidi ziu Antoni in sa muredda sutta 'e s'umbullu in parza a sa friscura po zappare unu rimediu a sa calura. Buongiorno a fostè ziu Antoni Serra a mi ddu narat unu contu 'e gherra? Po attie finzas duos caru Antoneddu ma prima bae a domo 'e ziu Anghelleddu ca po sas cambas mias issu est lontanu e comporammi unu zigarru toscanu. Monto in sa canna e iscudo de isprone e trottande comente unu campione cun s'inari istrintu bene intr'e sa manu curro a ddi comporare su toscanu. Zirau s'ispuntone 'e ziu Anghelleddu una boche mi zirriat...pizzoccheddu!... mi depes faghere unu piaghere mannu ormai ch'est passadu azumai un annu c'appo zau s'isquadra tunda a ziu Anzellinu m'aiat pregau in benujos mischinu maraditta sa die chi mi seo fidau... e cussu farabuttu m'hat frigau Comente fazzo mi zerbit propiu como ma si cras' a manzanu no est in domo comente est beru ca mi nanta trabadore di fazzo su cullu a crabettore agarro una pistolla e chene cura d'isparo de repente a isconcadura... ...non potho custu est foras de chistione ca seo fainde solu una cummissione... po praghere pregonta de Anzellinu muradore e finzas balente iscalpellinu, De ispuntone a ispuntone happo zirau sempre de ziu Anzellinu pregontende e a s'improvvisu...chi est chi m'est chirchende? Ziu Anzellinu?...m'hat nau ziu trabadore ca bos faghet su cullu a crabettore na' ca tenet pronta sa sigura o puru d'isparat a isconcadura onzi borta e custa est sa sigunda chi azes picadu bois s'isquadra tunda. In custu momentu da portaio in manu ma est coladu lestru ziu Tatanu e m'hat nadu mi servit solu unu minutu e lestru s'isquadra si c'at juttu si ziras s'ispuntone propiu innoghe azzappas sa callada 'e Bore Coghe e zampulladu c'as su tabacchinu capaze chi d'agattasa in camminu. E zeo currinde che frusia a più non posso c'arribbo subitu a su chinau 'e josso. Nezzet cudda zia inue bivet ziu Tatanu? Si ziras a destra du est Pittanu derettu poi c'arribbasa a su ladere inie bivet Tatanu chi d'est frade. In cale omo bivede ziu Tatanu? seo zirande tottu su manzanu m'hanta mandau a ritirare s'isquadra... pag'a s'ora Efisiu che d'hat leada curre dopo sa omo 'e su maistu 'e pannos ch'istuppasa erettu a bie sos cannos e superau chi c'as su muntonarzu appustis du est su mollinarzu e passadu chi c'as totu sa ia sese arribau a S.Maria e inie Antoneddu meu finit sa gherra t'agattasa a cara 'e ziu Antoni Serra. A su fine currinde chenz'e arreu che seo torradu a su chinau meu cun su inari ancora istrintu in manu ziu Antoni mi pedit.. e su toscanu??? M'iscuset ma l'appo dau a fullanu!!!