Sonetti epistolari al caro compare
Giovanni Mulas di Carbonia.
Compare non mi soe ismentigadu
pro ritardare de custa manera
da cando mades fattu sa litera
lu fia e so ancora orioladu.
Cand'unu es biu a semper un'ispera
si manera su tempus no la dadu
ma s'oriolu che cheret cazzadu
puru chi siat de forma lezzera.
Compare su ritardu es cosa mala
ca inasprit s'idea a su poeta
prite mancat rispettu a s'esistenzia.
Però bois lassadel'a un'ala
s'ades fattu pro casu una mineta
com'iscriemus cun prus frequenzia.
Compare Pietrinu Marchi
Duncas coment'istades de salude
bois nepode ostru fizu e nura
credo godedas sa salude pura
cun s'isettu de creschet cun virtude.
Viver goi lontanu es cosa dura
non chelzo pro lamentos de m'illude
chilco sa volontade si sena dude
pro passare su tempus cun dulzura.
Ma si podia compare istimadu
su tempus permittindemi donzora
de istare iscriende notte e die.
Tottu cust'es chi apo ritardadu
ma cun s'idea de poder'iscrie
ca meritades ch'iscrio ancora.
Termino ma no apo ritardadu
non creo d'esser vanu su mentou
pro sa Pasch'e Nadale e s'annu nou
sia cant'ades semper disizadu.
Nessi chi Deus lu diad'a prou
deo sempre su bene apo pregadu
pro s'amor'e donz'essere creadu
l'apa donz'unu a piaghere sou.
Bois bos cunservadas fort'e sanu
e dignitosamente la passedas
in cussos lidos de su campidanu.
Chelzo ch'in su coro mi tenzedas
prite ca deo bo lu doe in manu
sibbene sos amigos sian medas.