SU RAMINAJU E SU FATTUZU
De Prantaferru
In tempus de sa gherra europea
cando sa gioventude ' 'ogni ramu
suggetta a richiamu
oras tristas viviat in pelea
su vintibattor de su mese e maju
unu male fadadu raminaju
de sos ch'andant a labiolu a coddu
pro faghet calchi soddu
mentres fit cuntratende una faina
rezzeit sa famosa cartulina.
It'assuconu! Dare est netzessariu
s'adiu a tribaglios e balanzos
chi si puru sunt lanzos
bastant a isbarcare su lunariu
ma mentres fit in penzos et annuzu
curreit a si fagher su fattuzzu
da' Babbai Peddosu in Biddazzona
(Ite persona 'ona.....!)
in s'intentu de nd'esser iscampadu
d'andare in gherra e fagher su soldadu.
Arrivat a sa punta 'e mesu-die
sueradu istancu a sa fadiga manna
et zoccat a sa janna
cun su coro suspesu appen'inie
est Babbai Peddosu in domo solu
su raminaju l'esternat su dolu
et nd'hat promissa zerta et sacrosanta
chi ateros chimbanta
dae s'opera sua han tentu iscampu
et ch'isse puru non b'andat nemancu.
Pro cumpensu 'e su sou toccasana
miraculosu balsamu 'e consolu
su menzus labiolu
nou, lughente a tinnidu 'e campana
li lassat volentieri cun s'isettu
ch'appenas visitadu in su distrettu
diat torrare ancora prontamente
cun ateru presente
in signu 'e gratitudine che fizzu
pro che l'aere salvadu da' fastizzu.
De sa visita medica 'enit s'ora
su Duttore l'osservat cun talentu
et in d'unu momentu
ch'est su male fadadu torra fora
ma.. s'abbizat s'iscuru de s'imbrogliu
cand'ispantadu lezzet in su fogliu
ch'a fagher su soldadu l'hat fatt'abile
ah.. triste miserabile
si chimbanta ingannadu nd'has gasie
non ti resessit de frigare a mie.
Et curret che saeta a Biddazzona
da' Babbai Peddosu a sa presentzia
et cun finta passentzia
li narat chi li porat nova bona
infattis da' su magicu portentu
sa riforma totale nd'hat ottentu
et si cheret luego isdebitare
si li cheret torrare
su labiolu chi prima l'aiat dadu
ch'a s'otto bi lu torrat istagnadu.
Peddosu zedit sena ponner anca
et li torrat s'oggettu a l'abellire
movendesi a partire
su raminaju li nat nettu e francu
miserabile.. perfidu imbroglione
des finire sas dies in presone
si no happo fortuna 'e mi salvare
et sanu happ'a torrare
non solu de ti dare una labia
ma ti trunco s'ischina in fide mia.
De Prantaferru
In tempus de sa gherra europea
cando sa gioventude ' 'ogni ramu
suggetta a richiamu
oras tristas viviat in pelea
su vintibattor de su mese e maju
unu male fadadu raminaju
de sos ch'andant a labiolu a coddu
pro faghet calchi soddu
mentres fit cuntratende una faina
rezzeit sa famosa cartulina.
It'assuconu! Dare est netzessariu
s'adiu a tribaglios e balanzos
chi si puru sunt lanzos
bastant a isbarcare su lunariu
ma mentres fit in penzos et annuzu
curreit a si fagher su fattuzzu
da' Babbai Peddosu in Biddazzona
(Ite persona 'ona.....!)
in s'intentu de nd'esser iscampadu
d'andare in gherra e fagher su soldadu.
Arrivat a sa punta 'e mesu-die
sueradu istancu a sa fadiga manna
et zoccat a sa janna
cun su coro suspesu appen'inie
est Babbai Peddosu in domo solu
su raminaju l'esternat su dolu
et nd'hat promissa zerta et sacrosanta
chi ateros chimbanta
dae s'opera sua han tentu iscampu
et ch'isse puru non b'andat nemancu.
Pro cumpensu 'e su sou toccasana
miraculosu balsamu 'e consolu
su menzus labiolu
nou, lughente a tinnidu 'e campana
li lassat volentieri cun s'isettu
ch'appenas visitadu in su distrettu
diat torrare ancora prontamente
cun ateru presente
in signu 'e gratitudine che fizzu
pro che l'aere salvadu da' fastizzu.
De sa visita medica 'enit s'ora
su Duttore l'osservat cun talentu
et in d'unu momentu
ch'est su male fadadu torra fora
ma.. s'abbizat s'iscuru de s'imbrogliu
cand'ispantadu lezzet in su fogliu
ch'a fagher su soldadu l'hat fatt'abile
ah.. triste miserabile
si chimbanta ingannadu nd'has gasie
non ti resessit de frigare a mie.
Et curret che saeta a Biddazzona
da' Babbai Peddosu a sa presentzia
et cun finta passentzia
li narat chi li porat nova bona
infattis da' su magicu portentu
sa riforma totale nd'hat ottentu
et si cheret luego isdebitare
si li cheret torrare
su labiolu chi prima l'aiat dadu
ch'a s'otto bi lu torrat istagnadu.
Peddosu zedit sena ponner anca
et li torrat s'oggettu a l'abellire
movendesi a partire
su raminaju li nat nettu e francu
miserabile.. perfidu imbroglione
des finire sas dies in presone
si no happo fortuna 'e mi salvare
et sanu happ'a torrare
non solu de ti dare una labia
ma ti trunco s'ischina in fide mia.